Ako’y nakakulong sa kahong maliit.
Pilit sumisiksik na libag sa singit.
Kutis ko’y malagkit, pawis ay madikit.
Hangad ay magkubli, iwas panlalait.
Sa ‘king pagnanais na ika’y maakit,
Sasalok ng tubig, tubig na mainit.
Bago pa ibuhos, mata’y ipipikit.
Hihiling sa Diyos, mawala ang anghit.
Sana’y sa pagmulat, ‘di na ako pangit
para mabawasan ang aking pasakit.
Sasabunin lahat – paa hanggang anit.
Bato’y pangkukuskos kahit na masakit.
Pagtapos magbanlaw, ako’y mag-aahit –
bigote at balbas, para walang sabit,
kung saka-sakaling, tayo’y mag-iinit.
Isang panaginip na ‘di makakamit.
Kung ako’y lalapit, sana’y ‘di magalit.
Nag-iisip-isip. Habang nagdadamit,
repleksyo’y nasilip, nabasag ang lupit.
Kahit bagong ligo, mabaho na ulit.
Walang komento:
Mag-post ng isang Komento